Home / BELGE / Hevpeymana Civakî ya Federaliya Demokratîk ji bo Bakurê Sûriyê

Hevpeymana Civakî ya Federaliya Demokratîk ji bo Bakurê Sûriyê

Pêşgotin (dîbace)

Em gelên Rojava – bakurê sûriyê ji Kurd, Ereb, Suryan, Asûr, Tirikmen, Ermen, Çeçan, Çerkes, misilman, xiristiyan, êzîdî û hemû mezheb û doktrînên me; têgihiştîne ku Netew-Dewlet ew e ya Kurdistan, Beytnehrên û sûriyê kiriye navenda kaosa ku Rojhilata Navîn tê de derbas dibe, her wiha ew pirsgirêk, alozî mezin û xemgîniyê tîne serê gelên me.

Sîstema netewperestî yê dîktatorî (qereqoşî) yê ku sitemkarî û bêdadî derheqê gelê sûriyê bi hemû pêkhateyên wî; dimeşand û dimeşîne, ew e yê ku welat gihandiye rewşa wêran û parçekirina rêsandina civakî, û ji bo ku em ji vê kaosê derkevin em dibînin ku sîstema Federaliya Demokratîk ew sîstema nimûne ye (ya herî baş) ji bo sererastkirina kêşeyên dîrokî, civakî û netewî li sûriyê.

Federaliya Demokratîk a Bakurê Sûriyê li ser tîgîneke erdnigarî, nenavendî, siyasî û rêveberî; hatiye damezrandin, ew jî beşeke ji Federaliyê Demokratîk a Sûriyaya yekgirtî.

Sîstema federaliya demokratîk a aheng (lihevkirî) yê ku misogeriya beşdarbûna hemû kes û civatan bi wekhevî di gotûbêj, biryar û pêkanînê; dike. Her wiha cudabûna nijadî û olî li gor taybetmendiyên her civateke li ser bingeha jiyana hevbeş û biratiya gelan; li ber çavan derbas dike. Wekheviya hemû gelan derbarê maf û erkan de; misoger dike, û rêzdariyê dike li hemberî mafên mirovan her wiha aştiya navxweyî û cîhanî diparêze.

 

Di bin siya pergala federaliya demokratîk de dê hemû pêkhateyêh gel, rêxistin û saziyên xwe yên demokratîk saz bikin û di serî de jin û ciwan. Her wiha pêkanîna hemû çalakiyên siyasî û civakî bi awayekî azad, ligel hemû ciyawaziyên ku hevjiyana azad û wekhev peyda dike.

 

Pergala Federaliya Demokratîk li Bakurê Sûriyê di vê hevpeymanê de xwe dispêre nirxên şaristaniya demokratîk ên rewanî û heyberî (maddî û manewî) yên Rojhilata Navîn. Û bi vîna azad a hemû pêkhateyên Bakurê Sûriyê û li gorî rêgezên Neteweya Demokratîk, lihevkirin li ser vê hevpeymanê pêk hat.

 

 

Beşa Yekem

Rêgezên Giştî

 

xala /1/

Ev belge bi navê Hevpeymana Civakî ya Federaliya Demokratîk a Bakurê Sûriyê bi nav dibe û ev pêşgotin (dîbace) weke parçeyekî nayê qutkirin ji vê hevpeymanê ye.

Xala /2/

Federaliya Demokratîk a Bakurê Sûriyê xwe dispêre sîstema ekolojîk, demokratîk û azadiya jinê.

Xala /3/

Federaliya Demokratîk a Bakurê Sûriyê rewatiya xwe ji vîna gelan û ji komên heyî digire di riya hilbijartinên azad û demokratîk.

 

Xala /4/

Hemû zimanên heyî di erdnigariya Bakurê Sûriyê de wekhev in di hemû

qadên jiyana civakî, rêveberî, fêrbûn, çand û danûstandina rêveberiyê de. Û her gel, jiyana xwe bi rêxistin dike û karûbarên xwe bi zimanê xwe dimeşîne.

Xala /5/

Ala taybet bi Federaliya Demokratîk a Bakurê Sûriyê û rêveberiyên wê, ligel ala Federaliya Sûriya Demokratîk tê bilindkirin, sembola wê heye û bi zagonekê tê birêxistinkirin.

 

Xala /6/

Sond

(ez bi xwedayê gewr e û xwîna pakrewanan sond dixwim ku ez ê Hevpeymana Civakî û xalên wê ji xwe re bingeh bigirim, mafên demokratîk ên gelan û nirxên pakrewanan biparêzim, azadî û ewlehiya herêmên Bakurê Sûriyê biparêzim, ez Sûriyeke federal biparêzim û ji bo pêkanîna dadmendiya civakî ya li gorî rêgeza Neteweya Demokratîk, bixebitim).

Xala /7/

Federaliya Demokratîk a Bakurê Sûriyê ji herêmên avabûyî li ser bingeha rêveberiyên xweseriya demokratîk pêk tê, ya ku rêxistinên demokratîk ên komikên bawerî, etnîkî, jinê, çandî û hemû beşên civakî ji xwe re bingeh digire.

Xala /8/

Federaliya Demokratîk a Bakurê Sûriyê xwe dispêre civaka birêxistinkirî û kesayeta azad, di vê çarçoveyê de, ji rêxistinên cîgayî yên gel, kom û pêkhateyan, ji xwe re bingeh digire.

 

Xala /9/

Jiyana demokratît û ekolojîk bingeh digre ji bo avakirina civakeke demokratîk û ekolojîk ji bo rawestîna danûstandina neheqî ligel xwezayê, talankirin û wêrankirina wê.

 

Xala /10/

Çespandina jiyana hevbeş li gorî rêgezên Netewa Demokratîk a tije ji biratiya di navbera gel û komikan li Bakurê Sûriyê de, di bin banê pergaleke civakî, demokratî, azad û dadmend.

 

Xala /11/

“Federaliya Demokratîk a Bakurê Sûriyê” li ser rêgeza ku erd, av û enerjî bibe komîn; ava dibe. Û xwe dispêre pîşesaziya ekolojî û aboriya civakî bi awayekî bingehîn, û rê nade kedxwarî, yekdestî û tişteyîkirina jinê (metakirina jinê), garantiya tenduristî û civakî ji bo her kesî ve; pêk tîne.

 

Xala /12/

Federaliya Demokratîk a Bakurê Sûriyê, sîstema hevserokatiyê di hemû qadên jiyana polîtîka, civakî, rêveberî û hwd, ji xwe re bingeh digire û ev sîstem rêgeza sereke di nûnertiya wekhev a her du zayendan de ye, beşdariyê di rêxistinkirin û çespandina pergala konfederalîzma demokratîk ya taybet bi jinê de.

 

Xala /13/

Misogerkirina azadî û mafên jinê di civakê de û wekheviya her du zayendan.

 

Xala /14/

Jin xwediya vîneke azad e, di malbata demokratît a ku li ser bingeha jiyana wekhev û hevbeş ava bûye.

 

Xala /15/

Ciwan ew hêza bibandor û pêşeng di civakê de ne û beşdariya wan di hemû qadên jiyanê de misoger e.

Xala 16/

Nûnertiya dadmend ji bo hemû pêkhateyên etnîkî di hemû saziyên rêveberî yên bi ser federaliyê ve û li gorî dîmografiya herêman.

 

 

 

Beşa Duyem

Maf û Azadiyên Giştî                    

 

Xala /17/

“Federaliya Demokratîk a Bakurê Sûriyê” rêzgirtina xwe ji mafên ji “ragihandina cîhanî ya mafên mirovan  ” re diyar dike, her wiha hemû lîsteyên mafên mirovan ên girêdayî wê.

Xala /18/

Mafê jiyanê di vê hevpeymanê de, mafekî  bingehîn û parastî ye û li gorî wê sezaya darvekirin (îdam) nayê erêkirin.

 

Xala /19/

Rûmeta mirov parastî ye, nabe ku ji aliyê laş û derûniyê ve  îşkence bibe û yê vî karî bike tê sezakirin.

Xala /20/

Mafê gel, kom û pêkhateyên civakê di rêxistinkirina xwe bi serbestî de; heye. çewisandin, pişaftin, helandina çandî, tunekirin û dagerkirin weke sûcekî li dijî mirovatiyê tê dîtin, û mafê rewa yê gelan heye ku têkoşînê li dijî vê yekê bikin.

 

Xala /21/

Her herêmek an komek mafdar e di biryardayîna karûbarên xwe de, bi mercê ku dijatiya Hevpeymana Civakî neke.

 

Xala /22/

Mafê her kesî heye di azadiya baweriyê, wîjdan û ramanan de, her wiha mafê xwerêxistinê û daberîna xwe; heye.

 

 

 

Xala /23/

Her kes di beşdariya jiyana polîtîka, namzedî û hilbijartinan de li gorî zagonê, mafdar e.

 

Xala /24/

Nabe ku tu kes bê biçûkxistin an jî bi sedema cudahiya di reng, zayend, etnîk, ol û bawerî de bê dûrxistin.

 

Xala /25/

Tundiya li dijî jinê, kedxwariya wê yan jî sepandina ciyawaziya neyînî li dijî jinê, ji sûcên ku zagon ji bo wê seza dike.

 

Xala /26/

Jin di beşdarbûna wekhev de, di hemû qadên jiyana (siyasî, civakî, çandî, aborî û rêveberî ..hwd) de, mafdar e. her wiha di stendina biryar;n girêdayî wê de mafdar e.

 

Xala /27/

Ciwan derbarê rêxistinbûyîn xwe bi awayekî taybet û nêzî xweserbûyînê; mafdar in. Her wiha di cihgirtina xwe ya çalak di hemû qadên jiyanê de, mafdar in.

 

Xala /28/

Her bertawanek bêsûc e, da ku tawana wî were çespandin.

 

Xala /29/

Nabe ku cihên taybet an mal bên derbaskirin an pişkinînkirin, bêyî destûra dadweriyê pê hebe, ji bilî rewşên li ser sûcê.

 

Xala /30/

Bêyî belgenameyeke zagonî hebe, azadiya kesayetî nayê tengkirin.

 

Xala /31/

Mafê xweparastinê mafekî pîroz e, nabe ku bê tengkirin û zagon mafê dadgerînê ji her kesî re, misoger dike.

 

Xala /32/

Her kes mafdar e ku di civakeke ekolojîk û saxlem de; bijî.

 

Xala /33/

Kom û pêkhateyên çandî, etnîkî û olî di binavkirina rêveberiyên xwe yên xweser , parastina çandên xwe û sazkirina rêxistinên xwe yên demokratîk de mafdar in. Nabe ku ti kes an pêkhate baweriyên xwe li ser kesên din bi zorê bisepîne.

 

Xala /34/

Fêrbûn di hemû qonaxên xwe de; bêpere ye. Fêrbûna seretayî û navîn neçar e.

 

Xala /35/

Her hemwelatiyek mafdar e di kar, miqatebûna tenduristî, veguhastin û bidestxistina malekê de.

 

 

 

Xala /36/

Mafên kedkaran di kar û jiyana civakî de misoger e.  her wiha piştgiriya rêxistinên wan û ev yek bi zagonekê tê birêxistin kirin.

 

Xala /37/

Zagon azadiya ragihandin, çapemenî û weşanê misoger dike.

 

Xala /38/

Her kes mafdar e ku bigihêje agahiyê û bidest bixe.

 

Xala /39/

Her kes mafdar e di pêşxistin û belavkirina çalakiyên xwe yên çandî û hunerî de.

 

Xala /40/

Her kes mafdar e di xwesteka penaberiya mirovî û siyasî de, nabe ku penaber bêdilî vegere welatê xwe.

 

Xala /41/

Saman û derametên xwezayî, samanên giştî yên civakê ne. Veberhênan, rêveberî û mercên destkariya wan bi awayekî dadmend bi zagonekê tên rêxistinkirin.

 

Xala /42/

Maf di veberhênana projeyên taybet de heye, ku hevsengiya ekolojîk li ber çavan digirin. Xizmetguzariyên pêwîst ji bo geşedana aborî, peydakirina pêdiviyên civakî ji xwe re armanc digire, û aktîvkirin û xurtkirina çalakiyên aborî yên hevbeş beşdar dibe.

 

Xala /43/

Mafê milkên taybet parastî ye bi awayekî ku li dijî berjewendiyên giştî dernekeve, û ev yek bi zagonekê tê rêxistinkirin.

 

Xala /44/

Beşdariya hemû hemwelatiyan di parastina rewa de ji bo Federaliya Demokratîk a Bakurê Sûriyê yan Federaliya Sûriya Demokratîk; maf û erk e ji bo bersivdana çi êrîşê be.

 

Xala /45/

Garantiya mafên kesên astengdar (kêmendam), û peydakirina jiyana baş û birûmet ji bo pîr û temendirêjan.

 

Xala /46/

Mafên zarokan parastî ye. Karkirin û kedxwariya wan qedexe ye.

 

 

 

 

 

 

 

Beşa Sêyem

Pergala Civakî

 

 

Parçeyê Yekem

Xala /47/

Gel û komên di “Federaliya Demokratîk a Bakurê Sûriyê” de jiyana xwe ya civakbûyîna demokratîk û azad li ser bingeha sazkirina komîn, yekîtiyan û encûmenan; birêxistin dike. Pergala demokratîk a civakê li ser bingeha van saziyan pêşdikeve û cih digire.

 

Xala /48/

Komîn:

Ew e şêweya rêxistinbûyînê ya bingehîn û sereke ye ji demokrasiya rasterast re. Dezgeha biryardayîn û rêveberiyê ye li gorî qada wê ya rêveberî û rêxistinî. Komîn weke encûmenek (mecliseke) serbixwe di hemû qonaxên çêkirina biryarê de, dixebite.

 

Xala /49/

Encûmen:

Ew yekîneyên civakbûyînê yên ku nûnertiya gel dikin, ku biryarên derbarê karûbarê xwe de distîne û polîtîkayên pê ve girêdayî diyar dike, ji gund, tax û navçeyan despê dike. Parastina civakê pêkane dike, berdewamiya wê misoger dike, hem jî pêkanîna armancên wê di milê polîtîka, civakî, çandî û aborî de dike. Civakê birêxistin dike di riya xurtkirina demokrasiya rasterast di mekanîzmeyên wê de. Bingeh û rêgezên têkildarî jiyana demokratîk û azad tîne holê.

 

Xala /50/

Hemû encûmen li gorî van bingehan tên sazkirin:

Meclis ji hejmarek besatiyê ji endamên hilbijartî, li gorî mezinbûna gelheyê bi rêjeya (60%) ji nûnerên ku yekser dengê gelê hilbijartî, bi dest xistine û (40%) ji nûnerên ku ji aliyê kom, beşên civakî veyên di nav xwe de tên hilbijartin. Ev yek li gorî demokratiya lihevkirî bi zagonekê tê rêxistinkirin.

  • Ne ji mafê endamên encûmen û desteyên rêvebiriyê ye ku zêdeyî du deman li pey hev serokatiya hevbeş bikin.
  • Encûmen gund, tax, bajarok, navçe, herêm an kanton ji nûnerên ku ji hêla komên etnîkî, bawerî, çandî, çînên civakî yan komînan di nava xwe de bi awayekî demokrat di hundirê sînorê xwe tên hilbijartin; pêk tên. Dema vedora hilbijartinî bi rêziknameyeke ji hêla encûmenan ve tê diyarkirin.
  • Hejmareke besayetî ji endamên desteya kordîneyî li tax, bajarok û desteya rêveber a navçe û herêmê; hildibijêre, û hevserokên wê jî hildibijêre. Çalakiyên xwe di riya komîteyan de rêxistin dike.
  • Endamên dezgeha dadê û rêveberiya ewlehiya hundirîn; erê dike, her wiha encûmen çavdêriya wan dike.

 

 

 

Parçeyê duyemîn

Encûmenên kantonan

 

Xala /51/

Navê kantonê di sîstema civaka ” Federaliya Demokratîk Bakurê Sûriyê” de ji ew tekûzbûna organîk a ku bajar ligel gundewarên di bin sîwana sînorê wê de ne, tê lêkirin.

 

  • Encûmena kantonê ew dezgeha zagonsaz a bi hilbijartinên dengdana azad ji gel û koman re ye û li gorî zagonên hilbijartinan saz dibe. Ji hejmareke besatiyê ji endaman pêk tê û li gorî mezinbûna gelheyê û mezinbûna kantonê ye.
  • Polîtîkayên têkildarî giştî kantonê plan dike û biryarên pêwîst derbarê vê yekê de distîne.
  • Encûmena kantonê çalakiyên xwe li gorî rêgezên Neteweya Demokratîk birêxistin dike û komîteyên xwe li ser bingeha wan rêgezan saz dike.
  • Encûmena kantonê, desteya rêvebir hildibijêre.
  • Encûmena kantonê, ji bo endamên dîwana dada civakî û rêveberiya ewlehiya hundirîn a kantonê; erê dike.
  • Çavdêriyê li dezgehên dadmendiyê, ewlehiya hundirîn û dezgehên rêveberiyê yên kantonê dike.

Xala /52/

Desteya Rêvebir a Kantonê

  • Ji hejmareke besatiyê ji endaman û hevserokatiyê pêk tê, ku ji aliyê encûmena kantonê ve tên hilbijartin.
  • Biryar û siyasetên ku ecncûmena kantonê diyar kiriyê pêk tîne. Ew berpirsyar e li pêşiya encûmena kantonê û raporên çalakiyên xwe yên asayî ji encûmenê re pêşkêş dike.
  • Desteya rêvebir a kantonê, çalakiyên xwe birêxistin dike û li gorî bingehên komîteyên ku ji hejmarên besatiyê ji endaman pêk tê. Her du berdevk çalakiyên her komîteyekê kordîne dikin. Berdevkên komîteyan ji endamên desteya rêvebir a kantonê ne.

 

Parçeyê sêyemîn

Xala /53/

Pergala  Herêmê:

Herêm di pergala “Federaliya Demokratîk a Bakurê Sûriyê” de ew yekîtiya rêveberiya xweser a ku ji kantonekê yan bêhtir e yan jî ji çend herêmên ku taybetmendiyên hevbeş ên dîrokî, demografî, aborî yan çandî hebin ku ciyawaz be bi tekûzkirin û gihaştina erdnîgarî jî.

 

Xala /54/

Maf, Raye û Berpirsyariyên Herêmê.

  • Herêmên rêveberiya xweseriya demokratîk di “Federaliya Demokratîk a Bakurê Sûriyê” de rêxistinbûyîna xwe û rêveberiya karûbarên xwe li gorî rêgezên rêveberiya xweseriya demokratîk di qadên siyasî, aborî, civakî, ewlehiya hundirîn, tenduristî, fêrkirin, parastin û çandê de; Ev rêveberî xwedî maf û rayeyên diyarkirî di çarçoveya zagonên ku ” Federaliya Demokratîk a Bakurê Sûriyê” derdixîne.
  • Her herêmek li gorî rêgezên xwetêrkirinê di beşê aborî de xwe birêxistin dike. Di xweşbûn û dewlemendiya civakî ya giştî de, di ” Federaliya Demokratîk a Bakurê Sûriyê” de beşdar dibe, li gorî hêz û rewşa xwe û para xwe jê digire.
  • Her herêmek belavkirina dadmend ji samanên binerd û sererd (petrol, av, mîngeya madenî, daristan) re di ” Federaliya Demokratîk a Bakurê Sûriyê” de ji xwe re bingeh digire. Belavkirina dadmend ji samanan re bi zagonekê tê birêxistinkirin.
  • Her herêmek mafdar e di avakirin û pêşxistina pergala xwe ya dada civakî de, bi mercê dijberiya Hevpeymana Civakî ya Federaliya demokratîk a Bakurê Sûriyê neke, her wiha dijberiya peyman û belgeyên mafên mirovan ên navnetewî neke.
  • Her herêmek berpirsyarê rêxistinkirin û xurtkirina hêzên ewlehiya hundirîn ên herêmê ye.
  • Her herêmek mafdar e di parastina rewa de li hemberî êrîşên jiderve, her wiha xwe dibîne weke berpirsyarê parastina Federaliya demokratîk a Bakurê Sûriyê û Federaliya Sûriya Demokratîk jî.
  • Her herêm dikare ku têkiliyên xwe yên dîplomatîk, aborî, civakî û çandî ligel gel û welatên derdorê pêş bixe û xurt bike, bi mercê dijberiya Hevpeymana Civakî ya Federaliya demokratîk a Bakurê Sûriyê û Federaliya Sûriya Demokratîk neke.
  • Pêkhateyên her herêmekê, jiyana xwe ya siyasî, civakî û çandî bi ziman û çandên xwe dimeşîne û xurt dike.
  • Rêgezên bingehîn û mekanîzmeya her bendek ji bendên maf, raye û berpirsyariyên herêman ên li jor hatine vegotin, bi zagonên cuda û bi awayekî berfireh tên diyarkirin.

Xala /55/

Encûmena Gelan li Herêmê

  • Ew encûmeneke ji bo nûnertiya gel û koman li her herêmekê ye. Bi rola zagonsazkirin, çavdêrî, plankirina siyasetên giştî radibe. Dema vedora wî ya hilbijartinê 4 sal in û mekanîzmeya karê meclis bi zagonekê tê birêxistinkirin.
  • Ji sedî çil (40%) ji endamên encûmena gelan li herêmê ji nûnerên hilbijartî bi awayekî demokratîk û rasterast di nava komên etnîkî, olî, bawerî û çandî de li gorî mezinbûna gelheya wê û ji sedî şêst (60%) ji nûnerên gel ên ji aliyê giştî gel ve di hilbijartinên giştî de wan hildibijêre.
  • Rûniştina yekemîn di roja 16’an piştî ragihandina encamên dawî de li hemû herêman ji aliyê komîseriya bilind a hilbijartinan ve lidar dikeve. Hevserokatiya encûmena rêvebir vexwendinê ji bo rûniştina yekemîn ji encûmena gelan a hilbijartî re dişîne, lê eger ji bo sedemin zehmet rûniştina yekemîn lidar neket, hevserokatiya encûmena rêvebir demeke din ji bo lidarxistina rûniştinê di nava 15 rojan de û hejmara besayetiyê pêk tê bi amadebûna (50+1) ji hejmara giştî. Endamê herî mezin bi tememê xwe serokatiya rûniştina yekemîn ji encûmena gelan re dike û tê de hevserokatî û dîwan tên hilbijartin. Eger pêwîstiyek tune be, rûniştinên encûmenê wê bi awayekî eşkere bin û li gorî rêziknameyê be.
  • Di rewşên awarte de dibe ku vedora encûmena gelan bê dirêjkirin ta 6 mehan, bi daxwaza 1/4 ji endaman an bi daxwazekê ji dîwana serokatiya encûmenê û bi erêkirina 2/3 ji endamên encûmenê.
  • Her endamek encûmenê di dema endamtiya xwe de xwedî destnedayînî ye (parastin), ji bo nêrînên xwe nayê pirskirin, bê destûra encûmenê nayê peyketin ,ji bilî rewşa li ser sûc û divabe dîwana encûmenê bê agahdarkirin.
  • Siyasetan plan dike û biryaran distîne derbarê qadên civakî, aborî, ewlehiya hundirîn, fêrkirin, tenduristî û çandê de li herêmê.
  • Dîwanekê ji 5 endaman hildibijêre û hevserokatî jî ji nav wan e, ji bo rêxistinkirin û meşandina çalakiyên encûmenê.
  • Bi erka sansûsr û çavdêriyê di riya komîteyan de radibe.
  • Hevserokatiya encûmena rêvebir bi piraniya 2/3 hildibijêre û hevserokatiyê erkdar dike ku şêweya encûmena rêvebir pêşkêş bike ji bo erêkirina wê. Her wiha mafdar e ku piştrastiya encûmena rêvebir an endamekî wê; rake.
  • Ji bo endamên dezgeha dadmendiyê, dezgeha ewlehiya hundirîn, endamên encûmena ragihandin, weşan û agahdariyê erê dike û çavdêriyê li ser çalakiyên wan dike.
  • Çalakiyên xwe birêxistin dike û li gorî rêgezên komîteyan dimeşîne. Civînên xwe yên asayî lidar dixe û di dema pêwîst de jî civînê lidar dixe.
  • Li gorî rêgezên rêziknameya xwe çalak dibe.
  • Bi amadekirin û çêkirina zagonan li herêmê radibe.
  • Budçeya giştî li herêmê erê dike.
  • Polîtîkayên giştî û plansaziyên geşedanê li herêmê erê dike.
  • Bexşandina lêborîna giştî li herêmê dide û erê dike.

 

Xala /56/

Encûmena Rêvebir a Herêmê

  • Ji hevserokatî, cîgirên wê û hejmarek ji desteyan saz dibe. Di encûmena rêvebir de, nûnertiya dadmend a gel, kom û beşên civakî ji xwe re bingeh digire.
  • Ew dezgeha rêvebirî ya li herêmê ye. Biryarên encûmena gelan û saziyên dadmendiyê pêk tîne û raporên çalakiyên xwe bi awayekî asayî jê re pêşkêş dike.
  • Li ser bingeha desteyan, xwe birêxistin dike û li gorî rêgezên Neteweya Demokratîk e. Hêza xwe ya rêvebirî û komunal li gorî wê ava dike. Serokatiya encûmenê, desteyên wê erkdar dike.
  • Nûnertiya desteyê, di riya du berdevkên ku ji endamên encûmena rêvebir in . Her desteyek ji hejmareke besatiyê ji endam û nûneran, li gor rewşa çalakiyên wan tê sazkirin.
  • Karê encûmena rêvebir tê sazkirin û rêxistinkirin. Têkiliyên di navbera rêveberî û saziyên din li gorî zagonekê jê re sazûman bûye tê sînorkirin.
  • Piştî sazkirina encûmena rêvebir û pexşandina piştrastiyê jê re, daxuyaniyek tê derxistin ku rojeva qonaxa bê, tê de diyar dibe û encûmen neçare ku di vedora xwe de, piştî erêkirina encûmena gelan, vê yekê pêk bîne.

 

 

 

Parçeyê çaremîn

Xala /57/

Kongreya Demokratîk a Gelan

Kongreya demokratîk Gelan nûnertiya hemû gelên jiyan dikin di bin sîwana ” Federaliya Demokratîk a Bakurê Sûriyê ” Ew sembola tekûzbûnê ye di jiyana biratî ya hevbeş de û ew yekîtiya azad û demokratîk e, ku gelên herêmê sazûman dikin.

Kongreya demokratîk a gelan ji gelên (Kurd, Ereb, Suryan, Aşûrî, Ermen, Tirkiman, Çerkes û Çeçanan) pêk tê, her wiha ji komên bawerî û çandî mîna (misilmantî, xiristiyanî, êzîdî) yên di bin sîwana Federaliya Demokratîk a Bakurê Sûriyê de ye. Her wiha ew binesazî û taybetmendiyên dîrokî, demografîk, erdnîgarî, olî, bawerî, etnîkî û çandî ji bo hemû gel û koman li ber çavan digire. Li ser bingeha xwestek û vînên wan tên sazkirin.

Kongreya demokratîk a gelan, mafê gel û koman di sazkirina rêveberiyên xweseriya demokratîk e de û azadiya bawerî, etnîkî û çandî bi zagonê; misoger dike. Sîstema konfederalî ya demokratîk di rêxistinkirina civakê de ji xwe re bingeh digire. Jiyana di nava hevsengiyeke ekolojîk û aborî de pêkane dike.

Kongreya demokratîk a gelan li rêxistinkirina herêmên rêveberiya xweseriya demokratîk, kom û yekîneyên cîgayî weke bingeha pergala konfederalîzm a demokratîk dinêre. Li ser bingeha vînên wan ên xweser; Yekîtiya hemû komên di bin sîwana Federaliya Demokratîk a Bakurê Sûriyê de ji xwe re armanc digire.

 

 

Xala /58/

Sazkirin û Rêxistina Kongereya Demokratîk a gelan

  • Hilbijartina endamên kongreya demokratîk a gelan her çar salan carekê ji aliyê gel, li gorî zagona hilbijartin û mezinbûna gelheyê li her herêmê pêk tê.
  • Kongreya demokratîk a gelan bi rola zagonsaziyê û nûnertiya giştî ji gel û komên di bin sîwana ” Federaliya Demokratîk a Rojava-Bakurê Sûriyê”
  • Endamên kongreya demokratîk a gelan bi vî awayî tên hilbijartin: ji sedî çil (40%) ji wan ji nûnerên hilbijartî bi awayekî rasterast û demokratîk di nava komên etnîkî, olî, bawerî û çandî de li gorî mezinbûna gelheyêya şêniyên wan û ji nav beşên civakî li gorî asoyên wan ên rêxistinî. û ji sedî şêst (60%) ji nûnerên gel ên bi hilbijartinên giştî ku giştî gel beşdarî wan dibin, tên diyarkirin.
  • Rêveberiya kongreya demokratîk a gelan ji hêla “dîwana serokatiyê” ku ji du hevserok û 4 cîgiran e pêk tê. Namzedên dîwana serokatiyê û hevserokatiya kongreyê tên pêşniyarkirin, piştî lihevkirina/erêkirina nûnerên kom û beşên civakî yên di kongreya giştî de ne. Hevserokatî bi erêkirna piraniya zêde ji hejmara tekûz ya endamên encûmenê pêk tê. Lê endamên dîwana serokatiyê bi dengdayîna 50+1 ji endamên beşdarî rûniştina kongreya giştî bûne tên hilbijartin. Her ku endamên kongreyê nû dibin, hevserokatî û cîgirên wan tên hilbijartin.
  • Kongreya demokartîk a gelan di riya komîteyan re dixebitin. Teşedayîna dawî ji biryar û projeyên pêşniyarkirî ji civîna kongreya giştî re tê dayîn. Eger pêdivî hebe dikare komîteyên pêwîst saz bike. Li gorî rêgezên rêziknameyê çalakiyên xwe dimeşîne.

 

Xala /59/

Erêkên wê

 

  • Hevserokatî û dîwana serokatiya kongreyê hildibijêre.
  • Bi piraniya 2/3 hevserokatiya encûmena rêvebir hildibijêre û wê bi pêşkêşkirina şêweya encûmena rêvebir di nava mehekê de erkdar dike da ku erê bike. Her wiha mafdar e ku piştrastiyê bidin kişandin ji encûmena rêvebir an yek ji endamên wê.
  • Polîtîka giştî plansaz dike û armancên stratejîk di hemû qadên jiyana civakê de diyar dike.
  • Hevpeymana Civakî amade dike yan diguhirêne, bi daxwaza çarîk (1/4) ji endamên kongreyê û erêkirina 2/3 ji endaman.
  • Ragihandina rewşa aştî û şer li herêmên Federaliya Demokratîk a Bakurê Sûriyê.
  • Her zagon an tiştên ku girêdayî “Federaliya Demokratîk a Bakurê Sûriyê” zagonsaz dike.
  • Di riya komîteyan re; Çavdêriyê li desteyan dike.
  • Kongre civînên xwe yên asayî û yên di dema pêwîst de lidar dixe, çalakiyan pêk tîne, çalakiyên pêşerojê plansaz dike, projeyên pêşniyarkirî guftûgo dike û biryarê pê distîne.
  • Ji bo endamên encûmena dadmendiyê, dezgeha ewlehiya hundirîn, endamên encûmena ragihandin, weşan û agahdariyê û komîseriya bilind a hilbijartinan erê dike û çavdêriya çalakiyên wan dike.
  • Ji bo binavkirin û bilindkirina fermandariya giştî ya encûmena leşkerî erê dike û çavdêriya çalakiyên wê dike.
  • Gotûbêjkirin û biryardayîna belge û peymanên bi navê Federaliya Demokratîk a Bakurê Sûriyê ligel saziyên ku netew an dewletan derbas dike yan komên cuda, Her wiha erê dike jî.
  • Dibe ku vedora kongreya demokratîk a gelan di rewşên awarte de û bi xwesteka 1/4 ji endaman an dîwana serokatiya kongreyê ta 6 mehan bê dirêjkirin û bi erêkirina 2/3 ji endamên kongreyê.
  • Erêkirina tevlîbûna herêmekê ji Federaliya Demokratîk a Bakurê Sûriyê re piştî ku Hevpeymana Civakî bipejirîne.
  • Erêkirina budçeya giştî ya Federaliya Demokratîk a Bakurê Sûriyê.
  • Erêkirin û pexşandina lêborîna giştî di Federaliya Demokratîk a Bakurê Sûriyê de.

 

Xala /60/

Erkên Dîwana Serokatiya Kongreyê

  • Nûnertiya “kongreya demokratîk a gelan di Federaliya Demokratîk a Bakurê Sûriyê de” Ew berpirsyarê rêkûpêkirin, koordînekirin û pêkanîna hemû çalakiyên kongreyê û çavdêriya wê dike.
  • Civînên kongreya giştî birêxistin dike û çavdêriya wê dike.
  • Komîteyan aktîv dike û çavdêriya wan dike.

 

 

Xala /61/

Encûmena Rêvebir a Federaliyê

  • Ji hejmareke besatiyê ji endaman tê sazkirin. Wekheviya nûnertiya her du zayendan pêk tê. Nûnertiya dadmend ji gel, kom û beşên civakî li herêman bingeh tê girtin. Dibe ku pexşandina endamtiya encûmena rêvebir ta (20%) ji kesên ne endamê kongreyê pêk were.
  • Endamên encûmena rêvebir ji nav namzedên ku hatine pêşniyarkirin ji aliyê encûmenên herêman ji endamên kongreyê tên hilbijartin. Eger kesin nehatin erêkirin ji aliyê kongreyê; navin nû tên pêşniyarkirin û nûnertiya dadmend ji herêman re li ber çavan tê girtin.
  • Eger pêwîstî hebe, hevserokên encûmenên rêvebir ên herêman mafdar in ku civînên encûmena rêvebir a federaliyê amade bibin.
  • Hevserokên encûmenên rêvebir ên herêman, nemafdar in ku ji bo hevserokatiya encûmena rêvebir a federaliyê xwe pêşniyar bikin.
  • Hevserokatî nûnertiya encûmena rêvebir û meşandina çalakiyên wê dike.

Xala /62/

Erkên Encûmena Rêvebir a Federaliyê

  • Biryaran pêk tîne û siyasetên ku kongreya demokratîk a gelan di Federaliya Demokratîk a Bakurê Sûriyê de plan kirine û bi diyar kirine, dimeşîne.
  • Çalakiyên dîplomatîk bi navê Federaliya Demokratîk a Bakurê Sûriyê dimeşîne.
  • Koordîne û desthevgirtinê di navbera herêman de di qadên siyasî, aborî, civakî û çandî de peyda dike.
  • Çavdêrî û şopandina xebatên desteyan dike.
  • Raporên xwe ji kongreya demokratîk a gelan di Federaliya Demokratîk a Bakurê Sûriyê de pêşkêş dike.
  • Encûmena rêvebir di Federaliya Demokratîk a Bakurê Sûriyê de di riya desteyên xwe de xwe birêxistin dike. Li gor rêgezên Netewa Demokratîk hêza xwe ya rêvebirina komunal; ava dike.
  • Her desteyek herî kêm ji şeş endaman pêk tê ku di nava wan de her du hevserok hebin ên ku çavdêrî û kordîneya xebatên wê dikin û ew her du ji endamên encûmena rêvebir in.
  • Desteyên di encûmena rêvebir a Federaliya Demokratîk a Barkuê Sûriyê de; çavdêriyê li ser xebatên desteyan li herêman dike her wiha piştgiriyê dide wan û kordîneyê di navbera wan de çê dike.

 

Parçeyê pêncemîn

Xala /63/

Saziya Ragihandin, Weşan û agahiyan:

  • Saziya ragihandin, weşan û agahiyan bi awayekî xweser xwe birêxistin dike, li gorî rêgezên ragihandin û weşana azad û demokratîk e. Alîkariyê dike ji bo pêşketin û piştgiriya saziyên ragihandin û weşanê. Di çarçoveyên zagonî de, çalakiyên wê yên ragihandinê peyda dike. di warê ragihandin û weşanê de yekdestiyê qedexe dike, lê belê çavdêriya pêkanîna azadiya ragihandinê li gorî azadiya civakî di bihîstina nûçe û agahiyên pêwîst de. her wiha di çarçoveyên zagonî de, ew erkdar e bi peydakirina piştgiriya darayî ji bo hemû dezgehên ragihandin û weşanê de, bi awayekî dadmend û wekhev.
  • Sazî ji hejmarekê besatiyê ji endaman pêk tê. Ji aliyê kongre yan encûmenên herêman nîvê wan tên hilbijartin, ku ji nûnerên kom û beşên civakî ne. û nîvê din ji hêla saziyên ragihandinê yên netewî tên hilbijartin.
  • Li gorî bingeh û rêgezên zagona ragihandin û weşanê, çalakiyên xwe dimeşîne. Li gorî qadên kar, xwe birêxistin dike û komîteyên xwe saz dike. li gorî bingeh û rêgezên rêziknameya xwe çalakiyên xwe dimeşîne.
  • ji aliyê encûmena gelan a di kongreya demokratîk a gelan de, çavdêrî li ser çalakiyên wê dibe.

Parçeyê şeşemîn

Xala /64/

Hêza Parastina Rewa

“Hêzên Sûriya Demokratîk” ew hêzên parastinê yên çekdar in di ” Federaliya Demokratîk a Bakurê Sûriyê” de. tevlîbûna fedekarî ji zarokên gel ve ji aliyekî ve û ji aliyê din ve erkê xweparastinê; bingeh digire. Bi parastina Federaliya Demokratîk a Bakurê Sûriyê û Federaliya Sûriya Demokratîk erkdar e, her wiha parastina wê ji çi êrîş an xeternakên jiderve ku çêbibin erkdar e. Parastina giyan û milkên hemwelatiyan, eger êrîş hebe peyda dike. Li gorî taybetmendiyên sîstema serlêdana leşkerî, bi awayekî xweser xwe birêxistin dike. Ji aliyê kongreya demokratîk a gelan û desteya parastinê ve çavdêrî li çalakiyên wê pêk tên.

 

 

Parçeyê heftemîn

Encûmena Hevpeymana Civakî

 

Xala /65/

Encûmena Hevpeymana Civakî ji hejmarek ji dadwer, zagonzan û mafnasan pêk tê. Hejmara wan tê diyarkirin û awayê bijartin û karê encûmenê bi zagonekê tê birêxistinkirin, ku ew zagon bi piraniya 2/3 ji endamên kongreya demokratîk a gelan were biryardayîn.

Kongerya gelan, di dema bijartina endamên encûmena Hevpeymana Civakî de, nûnertiya hemû pêkhateyan liber çavan digire.

 

Erkên Encûmena Hevpeymana Civakî

Xala /66/

  • Ravekirina deqên Hevpeymana Civakî dike.
  • Lênêrînê dike derbarê nedijberiya zagonên ku kongreya gelan derxistiye, û biryarên encûmena rêvebir, zagon û biryarên encûmenên herêman de ligel Hevpeymana Civakî.
  • Biryardayîna di nakokiyên têkildarî pêkanîna vê peymanê de, di navbera kongreya demokratîk a gelan, encûmena rêvebir û encûmena dadê de.
  • Biryardayîna di nakokiyên navbera federaliyê û herêman de yan jî di navbera herêman bi xwe de.
  • Eger yek ji berpozan di rewşa temyîza (îtiraz) ferwerên ku nedistûriya deqeke zagonî tê pêkanîn ji aliyê dadgeha ku biryara wê hatiye temyîzkirin û dadgeha ku li temyîz dinêre bibîne ku îtiraza wî cidî ye û pêwîst e biryar di îtirazê de bê standin, lênêrîna dozê ji liyê vê dadgehê ve tê rawestandin û dagerînî encûmena Hevpeyamana Civakî dike.
  • Encamên hilbijartin û referandumên giştî erê dike.

Parçeyê heştemîn

Sîstema dadê

/67/

Ew sîstema dada demokratîk e ku pirsgirêkên têkildarî dadmendiyê û mafên civakî di riya beşdariya gel û rêxistinkirina wî ya xweser re çareser dike. Armanca wê avakirina civakeke ku rêbaz û nêrîneke demokratîk û ekolojîk a bi azadiya jinê bawer e û jiyana komunal a hevbeş ji xwe re bingeh digire. Refên xwe li ser bingeheke exlaqî û polîtîka birêxistin dike. Xizmetguzariyên dadmendiyê di riya beşdariya civakî û rêxistinkirina yekîneyên cîgayî yên bi awayekî demokratîk hatine sazkirin; dimeşîne.

 

Xala /68/

Rêgezên dadê

  • Dada civakî weke bingeha rêxistinbûyîna civakê û xweparastina wê ye. Çareserkirina pirsgirêkên civakî yên têkildarî dadmendiyê di komînên gund, tax û bajarokan di ji xwe re bingeh digire. Diyalog, danûstendin û lihevkirinê bingeh digire di çareserkirina pirsgirêkên de.
  • Karên ku ziyanê digihînin jiyana civakî û jîngehê, weke sûcekî dibîne. Eger sûcek pêk hat, ew derfetê dide aliyên ziyanlêkirî ku mafê xwe biparêz in û derfetê li ber civakê vedike ku mijarê binirxîne û pêşniyarên xwe pêşkêş bike û beşdarî dayîna biryarê bide.
  • Armanca wê ji sezakirinê ew e; çaksazkirina tawandaran, ew tawandar ziyanên xwe sererast bikin, hişyarkirina wan û jinûve beşdariya wan di jiyana civakî de bi awayekî saxlem.
  • Derbarê pirsgirêkên têkildarî gel, kom û beşên civakî de, mafdar e ku mekanîzmeyên dadê saz bike û rêbazên çareseriya taybet bi wê pêş bixe, bi mercê dijberiya Hevpeymana Civakî yan mafên mirovan yên sereke neke.
  • Derbarê pirsgirêkên têkildarî berjewendiyên giştî û ewlehiya giştî ji bo hemû gel û koman de, çareseriya wan di riya dezgehên dadê yên nûnertiya tevayî civakê dike.
  • Di qada dadê û çalakiyên saziyên wê de, rêxistina jinê ya taybet û nûnertiya wekhev a jinê ji xwe re bingeh digire. biryarên têkildarî taybetiya jinê, dezgehên dadê yên jinan biryaran pê dide.

 

Xala /69/

Awayên Rêxistinê û Bingehên Xebatê

Dezgehên Pergala Dadê: ji komîteyên lihevhatinê, dîwanên dadê, komîteyên lêpirsînê û encûmena dadê pêk tê. Ew saziyên sereke ku ji bo pêkanîna dada civakî û xurtkirina wê çalak e. Endamên wê ji aliyê encûmenan ve tên hilbijartin.

  • Komîteyên Lihevhatinê: ji bo pêkanîna aştî û lihevhatinên civakî dixebite. Li gorî pêdiviyan, li her deverê û di hemû astan de xwe birêxistin dike. Ji komînan despê dike ta herêman û endamên wê ji fedekar û yên ji aliyê civakê ve tên pejirandin.
  • Dîwanên Dadê: ew dezgehên dadê ne yên xwe birêxistin dikin li herêm û kantonan û li her cihên pêwîst jî, bi armanca rakirina rewşên stema civakî û pêkanîna dadmendiyê. Endamên wê bi pêşniyarekê ji encûmenên dadê li herêman tên hilbijartin û bi dengdayînê ji encûmenên gelan li kantonan. Dîwanên dadê li navçe û herêman li gorî pêdiviyê tên sazkirin.
  • Komîteyên Lêpirsînê: ew dezgehên dadê ne ku bi asteke xuyanî ji pisporiyê di warê karê xwe de ne. ji bo şopandina rewşên sûcên bûne û vedîtina wan bi armanca pêkanîna dadmendiyê Endamên wê piştî dengdayînê ji encûmena heyî li cihên lê ne û erêkirinê li ser wan bi erkê xwe radibin.
  • Encûmenên Dadê li Herêman: saziyên dadê li herêman birêxistin û çavdêriya wan dike. Endamên wê bi dengdayîn encûmena gelan li herêmê tên erkdarkirin. Nûnertiya wekhev û demokratîk ji gel, kom û beşên civakê re peyda dike li gor para (kota) ku ji saziyên dadê re diyar bûye.
  • Encûmena Dadê di Federaliya Demokratîk a Bakurê Sûriyê de: li ser sansûr û çavdêriya pergala dadê berpirsyar e. Rapor, proje û reşpelên biryarên xwe derbarê çalakiyên dadê ji kongreya demokratîk a gelan re pêşkêş dike. Koordîneya pevguhêr di navbera herêman de peyda dike. Endamên wê bi pêşniyarekê ji encûmenên dadê li herêmê û bi dengdayîna ji kongreya demokratîk a gelan ve tên binavkirin.
  • Encûmena dada jinê di Federaliya Demokratîk a Bakurê Sûriyê: jin xwedî dezgeheke taybet e, ew dezgeh li hemû kêş e, karûbarê jinê û malbatê; dinêre. Her wiha mafê wê yê sansûrê û koordîneya ligel encûmenên dadweriya li herêmê; heye.

Parçeyê nehemîn

Xala /70/ Komîseriya Hilbijartinan a Bilind

  • Bi pêşniyarekê ji encûmena dadê ya Federaliya Demokratîk a Bakurê Sûriyê 1/3 ji endamên wê tên sazkirin û 2/3 ji endamên din bi pêşniyarekê ji kom û beşên din ên civakê saz dibin, hemû endam ji aliyê kongreya demokratîk a gelan ve tên erêkirin.
  • Ji hejmareke besayetiyê ya endamên pispor pêk tê. Berpirsyara plansazî, rêxistibûyîn û meşandina referendumên gelerî ye ku bi zagonekê tên diyarkirin, hilbijartinên endamên encûmena giştî ya kongreya demokratîk a gelan, hilbijartina endamên encûmenên gelan li herêman û hemû hilbijartinên zagonî û demokratîk, li gorî zagonê.
  • Di rewşên temyîzê û liberabûnên (îtirazên) hilbijartinan de biryarê dide, biryarên wê bê liberabûn in û li gorî rêziknameya xwe dixebite.
  • Bi rêxistinbûyîn û sazkirina komîseriya hilbijartinan li herêman radibe. bi pêşniyarekê ji encûmena dadê li herêmê 1/3 endamên komîseriya hilbijartinan li herêmê saz dibe û 2/3 din bi pêşniyarekê ji kom û beşên civkê, encûmena gelan li herêmê li ser erê dike.
  • Li gorî rêziknameya xwe, komîseriya hilbijartinan li herêman xwe birêxistin dike û komîteyên xwe li kantonan saz dike.
  • Ji bo civîna hilbijartinên partiyên siyasî û saziyên fermî di federaliyê û herêman de, dikere endamên xwe weke çavdêran bişîne.

Beşê çaremîn

Ferwerên giştî

 

Xala /71/

 

Şêweya pêwendiya di nabera ” Federaliya Demokratîk a Bakurê Sûriyê” û “Federaliya Sûriya Demokratîk” de di hemû astan de, li gorî distûreke lihevkirî û demokrat; tê diyar kirin.

 

Xala /72/

Hemû rêveberiyên hilbijartî di bin çavdêriya dezgehên ku ew hilbijartine de. Dezgehên ku deng dane(hilbijartin kirine) di dema pêwîst de, mafdar e ku baweriyê ji nûnerên xwe bikişîne. Ev yek bi zagonekê tê birêxistinkirin.

 

Xala /73/

Hemû mijarên çarenûsî yên têkildarî berjewendiyên civakê yên giştî mîna: vehûnandina Hevpeymana Civakî, beşdariya di peymanên navdewletî yan jêkişandin û rastkirina şêweyê pergalê.

 

Xala /74/

Pêkhateyên cîgayî mafdar in ji bo liberabûnê di biryarên dezgehên giştî de yên lidijî berjewendiyên wê û ne li gorî vîn û biryarên wê ne. Eger ew liberabûn bi lihevkirinekê çareser nebû,  dê pêşkêşî gelê têkildar bibe û encam tê rikandin.

 

Xala /75/

Eger dijayetî di navbera biryarên herêman an pêkhateyên cîgayî de bi berjewendiyên giştî re yan bi Hevpeymana Civakî re çê bibe, dibe ku encûmena Hevpeymanê  temyîz bike.

 

Xala /76/

Parastina jiyana ekolojîk û hevsengiya ekolojîk.

 

Xala /77/

Derametên xwezayî samanên civakê ne û veberhênan û bikaranîna wan li gorî pêdiviyên herêman pêk tê û bi zagonekê tên birêxistinkirin.

 

 

 

Xala /78/

Veberhênanên sermayeyên biyanî li gorî çarçoveya zagonî û bi erêkirina kongreya demokratîk a gelan û encûmena gelan li herêma têkildar; gengaz e.

 

Xala /79/

Di çarçoveya zagonê de, partî, tevgerên siyasî xwe dadimezirînin, birêxistin dikin û çalakiyên xwe bi awayekî azad dimeşînin.

 

Xala /80/

Sazî û rêxistinên civakî mîna komele, weqf, sendîka, yekîtî û ode û ji bilî wan di çarçoveya zagonên “Federaliya Demokratîk a Bakurê Sûriyê” bi awayekî azad xwe birêxistin dikin. Rêxistinên demokratîk ên beşên civakî di hemû qadan de tên pêşxistin û piştgiriyê distînin.

 

Xala /81/

Çi endamê kongreya demokratîk a gelan û encûmena gelan di herêmê de, ne mafdar e namzediya endamtiyê zêdeyî du deman li pey hev bikin.

 

Xala /82/

Temenê hilbijêr û namzed herî kêm 18 salî ye ji bo hemû sazî û encûmenên sîstema federal. Mercên namzedî û hilbijartinan bi zagoneke taybet tê diyarkirin.

 

 

Xala /83/

Ji bo rastkirina rêgezên giştî yên vê hevpeymanê, pêwîst e lihevkirinek ligel encûmenên gelan li herêman û erêkirina 75% ji endamên kongreye hebe.

 

 

Encûmena Damezrîner a Federaliya Demokratîk a Bakurê Sûriyê

  1. 12. 2016

 

About fedrasyonrojava

Check Also

Daxuyaniya Dawî Ya Civîna Duyemîn A Meclîsa Damezrîner A Federasyona Demokratîk Li Bakurê Sûrî.

  di siya pêşketin û bûyerên ku Sûrî û herêmê pêk hatine û encama amadehiyên ...

Leave a Reply

Your email address will not be published.

*